Next
फ्रान्स आणि जर्मनीचे लघुपट पाहण्याची संधी
येत्या १५ व १६ जून दरम्यान होणार लघुपट महोत्सव
BOI
Wednesday, June 12, 2019 | 12:01 PM
15 0 0
Share this article:

‘इंटरनॅशनल शॉर्टस कलेक्टिव्ह’ महोत्सवाची घोषणा पुणे फिल्म फाउंडेशनचे अध्यक्ष डॉ. जब्बार पटेल यांनी केली. या वेळी केतकी राजवाडे, प्रकाश मगदूम, डॉ. पटेल, हायडी वेट्ज कुबाक व रेणू जामगांवकर आदी उपस्थित होते.

पुणे : पुणे फिल्म फाउंडेशनच्या वतीने आयोजित करण्यात येणाऱ्या ‘इंटरनॅशनल शॉर्टस कलेक्टिव्ह’ या लघुपट महोत्सवात पुणेकर चित्रपट रसिकांना समीक्षकांनी गौरविलेले फ्रान्स व जर्मनी या देशांमधील लघुपट पाहण्याची संधी मिळणार आहे. पुणे आंतरराष्ट्रीय चित्रपट महोत्सवाचा कर्टन रेझर अर्थात पूर्वपीठिका म्हणून या महोत्सवाचे आयोजन गोएथ इन्स्टिट्यूट मॅक्स म्युलर भवन, अलायन्स फ्रॅन्कॉईज आणि राष्ट्रीय चित्रपट संग्रहालय संस्था यांच्या वतीने करण्यात आले आहे.

‘शनिवार, दि. १५ जून व रविवार, दि. १६ जून, २०१९ दरम्यान कोथरूड येथील दूरदर्शन केंद्राजवळील राष्ट्रीय चित्रपट संग्रहालयाच्या सभागृहात हा महोत्सव होणार आहे. शनिवार दि. १५ तारखेला दुपारी चार ते नऊ आणि रविवार दि. १६ जून रोजी सकाळी १० ते दुपारी ३.३० अशी या महोत्सवाची वेळ असणार आहे. हा लघुपट महोत्सव १८ वर्षावरील सर्वांसाठी विनामूल्य खुला असणार आहे’, अशी माहिती पुणे फिल्म फाउंडेशनचे अध्यक्ष व पिफचे संचालक डॉ. जब्बार पटेल यांनी पत्रकार परिषदेत दिली. या वेळी अलियान्स फ्रान्सेजच्या कल्चरल कोओर्डीनेटर केतकी राजवाडे, गोएथ इन्स्टिट्यूट मॅक्स म्युलर भवनच्या संचालिका हायडी वेट्ज कुबाक व रेणू जामगांवकर व राष्ट्रीय चित्रपट संग्रहालयाचे संचालक प्रकाश मगदूम देखील उपस्थित होते. 


या लघुपट महोत्सवाविषयी बोलताना डॉ. जब्बार पटेल म्हणाले, ‘पुणे फिल्म फाउंडेशनच्या वतीने महाराष्ट्र शासनाच्या सहकार्याने गेली १७ वर्षे पुणे आंतरराष्ट्रीय चित्रपट महोत्सवाचे आयोजन करण्यात येत आहे. वर्षामधून एकदा होणारा हा चित्रपट महोत्सव चित्रपट रसिकांसाठी पर्वणी ठरत असला, तरीही वर्षभरातदेखील रसिकांना देश विदेशातील आंतरराष्ट्रीय दर्जाचे चित्रपट, लघुपट पाहता यावेत व चित्रपट क्षेत्रातील जाणकार वाढावेत या उद्देशाने आम्ही ‘इंटरनॅशनल शॉर्टस कलेक्टिव्ह’ या लघुपट महोत्सवाचे आयोजन केले आहे. या महोत्सवाच्या माध्यमातून पुणे आंतरराष्ट्रीय चित्रपट महोत्सवाचे कर्टन रेझर अर्थात पूर्वपीठिका आम्ही करीत आहोत. अशा पद्धतीने वर्षभरात आम्ही दोन दिवसीय दोन कार्यक्रमांचे आयोजन करणार असून, त्याद्वारे पुणे आंतरराष्ट्रीय चित्रपट महोत्सव हा जास्तीत जास्त रसिकांपर्यंत पोहोचून जाणकार रसिक प्रेक्षक तयार होतील असा आमचा विश्वास आहे.’

केतकी राजवाडे म्हणाल्या, ‘या महोत्सवात ट्रेस कोर्ट आंतरराष्ट्रीय चित्रपट महोत्सवात दाखविण्यात आलेले प्रत्येकी चार मिनीटांहून कमी वेळेचे तब्बल ६२ चित्रपट रसिकांना पाहता येतील. यामध्ये फिक्शन, अॅनिमेशन, डॉक्युमेंट्री यांसारख्या अनेक प्रकारच्या लघुपटांचा समावेश आहे. याशिवाय अलाईज फ्रॅन्कॉईजच्या वतीने  फ्रॅन्कोफोन चित्रपट महोत्सवातील फ्रेंच भाषेतील लघुपटदेखील या वेळी दाखविण्यात येतील.’  

महोत्सवातील जर्मन चित्रपटांविषयी बोलताना हायडी वेट्ज कुबाक म्हणाल्या, ‘महोत्सवात ‘दि बर्लिनाले स्पॉटलाईट’, ‘शॉर्ट एक्स्पोर्ट २०१८’, ‘शॉर्टफिल्म्स ऑन टूर’ या महोत्सवात दाखविण्यात आलेले तब्बल २० जर्मन लघुपट रसिकांना पाहता येतील. या लघुपटांच्या माध्यमातून जर्मनीतील जीवनाचे प्रतिबिंब रसिकांना पाहता येईल.

या वेळी बोलताना प्रकाश मगदूम म्हणाले, ‘रसिकांना दर्जेदार चित्रपट पाहता यावेत या उद्देशाने राष्ट्रीय चित्रपट संग्रहालय नेहमीच प्रयत्नशील असते. या लघुपट महोत्सवात दाखवण्यात येत असलेले लघुपट आंतरराष्ट्रीय स्तरावर समीक्षकांनी कौतुक केलेले असल्याने या माध्यमातून त्या दर्जाचे चित्रपट पाहण्याची संधी रसिकांना मिळत असल्याचे समाधान आहे.’ 

(ही बातमी इंग्रजीतून वाचण्यासाठी येथे क्लिक करा.)
 
15 0 0
Share this article:

Post Your Comment
मराठी English
Your Name *
Email (Optional)
 
Notify me once my comment is published
Comment * Note: Comment will be published after review.
Content limited to 1000 characters,1000 characters remaining.

Select Language
Share Link
 
Search